شاکر شجاع آبادی دے چند اشعار

جیویں میکوں آنڑ رولایا ہئی ایویں میں وانگوں پل پل روسیں
ہک واری رو کے چپ کر باہسیں ول ڈکھسیاں دل توں ول روسیں
نا کوئی ڈکھڑے آنڑ ونڈیسیاں کوئی توں لاکھ سکیاں کوں گل روسیں
بس شاکر فرق میعاد دا ہے میں آج روندا توں کل روسیں

جیہڑا کم ہا یار رقیباں دا، اوہ سجن کریندا رہ گیۓ
جیکوں اپنڑاں سمجھ کے حال ڈتِم. میڈی پاڑ پٹیندا رہ گیۓ
لا تیلی میڈی جھونپڑی کوں. ہتھ پیر سِکیندا رہ گیۓ
بس شاکر بدلے پانی دے…. پٹرول سٹیندا رہ گیۓ

نبھا نہ سگیں تاں سہارا نہ ڈیویں
کوئی خواب میکوں اُدھارا نہ ڈیویں
زمانے دے رلے جے ماریں توں پتھر
رقیباں کوں اکھ دا اشارہ نا ڈیویں
میڈا ہتھ پکڑ کے جے ول چھوڑ ڈیویں
بھنور اچ میں ٹھیک آں کنارہ نا ڈیویں
سجن تیڈی نفرت ملاوٹ تو پاک ھئے
محبت دا دھوکہ دوبارہ نا ڈیویں
عمر کھپدیں ساری گزاری اے شاکرؔ
بڈھیپے دے وچ توں کھپارا نا ڈیویں​

ساکوں ہوس دے شوق چا طوق پوائے اساں دنیا دے سردار ہاسے
لگی وائرس آ بے غیرتی دی نتاں کڈن ضمیر بیمار ہاسے
ساڈا طارق دا کردار وی ہا اساں ٹیپو دی یلغار ہاسے
اساں شاکر بال کھیڈاونے ہیں کدیں ڈو موہیں تلوار ہاسے

مرے رازق رعایت کر نمازاں رات دیاں کر دے
کہ روٹی رات دی پوری کریندے شام تھیں ویندی
انھاں دے بال ساری رات روندن بھک تو سوندے نئیں
جنھاں دی کیندے بالاں کوں کھڈیندے شام تھی ویندی
میں شاکر بھکھ دا ماریا ہاں مگر حاتم توں گھٹ کئی نئیں
قلم خیرات ہے میری چلیندے شام تھی ویندی

کیہندے کتّے کھیر پیون کیہندے بچّے بھکھ مرن
رزق دی تقسیم تے ہک وار ول کجھ غور کر
غیر مسلم ہے اگر مظلوم کوں تاں چھوڑ دے
اے جہنمی فیصلہ نہ کر اٹل کجھ غور کر

اے پاکستان دے لوکو پلیتاں کوں مکا ڈیوو
نتاں اے جے وی ناں رکھے اے ناں اوں کوں ولا ڈیوو
جتھاں مفلس نمازی ہن او مسجد وی اے بیت اللہ
جو ملاں دیاں دکاناں ہن مسیتاں کوں ڈھا ڈیوو
اتے انصاف دا پرچم تلے انصاف وکدا پئے
ایہوجی ہر عدالت کوں بمعہ املاک اڈا ڈیوو
پڑھو رحمن دا کلمہ بنڑوں شیطان دے چیلے
منافق توں تے بہتر ہے جے ناں کافر رکھا ڈیوو
جے سچ آکھن بغاوت ہے بغات ناں اے شاکر دا
چڑھا نیزے تے سر مینڈھا مینڈے خیمے جلا ڈیوو

میکوں مینڈا ڈکھ ، میکوں تینڈا ڈکھ ، میکوں ہر مظلوم انسان دا ڈکھ
جتھاں غم دی بھا پئی بلدی ہے میکوں روہی چولستان دا ڈکھ
جتھاں کوئی انصاف دا ناں کوئی نئیں میکوں سارے پاکستان دا ڈکھ
جیہڑے مر گئے ہن او مر گئے ہن میکوں جیندے قبرستان دا ڈکھ

غریب کوں کئیں غریب کیتے ، امیرزادو جواب ڈیوو
ضرورتاں دا حساب گھنو ، عیاشیاں دا حساب ڈیوو
سخاوتاں دے سنہرے پانڑیں ، دے نال جیہڑے مٹا ڈتے نیں
او لفظ موئے بھی بول پوسن ، شرافتاں دی کتاب ڈیوو
شراب دا رنگ لال کیوں اے ، کباب دے وچ اے ماس کیندا
شباب کیندا ہے ، کئیں اُجاڑے حساب کر کے جناب ڈیوو
زیادہ پھلدا اے کالا جیکوں ، خرید گھن دا اے اوہو کرسی
الیکشناں دا ڈرامہ کر کے ، عوام کوں نہ عذاب ڈیوو
قلم اے منکر نکیر شاکر ، جتھاں وی لکسو اے تاڑ گھن سی
غلاف کعبے دا چھک کے بھانوں ، ناپاک منہ تے نقاب ڈیوو

72 حور دے بدلے گزارہ ہک تے کر گھنسوں
71 حور دے بدلے اساں کوں رک کے روٹی دے

نجومی نہ ڈراوے دے اساکوں بدنصیبی دے
جڈاں ہتھاں تے چھالے تھئے لکیراں خود بدل ویسن

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s